НЛО во Куманово

Кумановци во понеделникот навечер над градот виделе голема светлина која кратко се задржала на небото, а потоа исчезнала.

Необичната светлечка појава во вид на топка доаѓала од правец на населбите „Перо Чичо„ и „Иго Тричковиќ„, а граѓаните ја забележале околу 20.15 часот. Можела да се види од периферијата, но од центарот на градот.

Работев во дворот, кога брат ми и мајка ми рекоа да видам што паѓа од небото. Тогаш здогледав, необично бела светлина во облик на топка што се движеше со голема брзина во насока на населбите Банево Трло и Пуковско. Сето тоа траеше околу 1 минутка и оддеднаш исчезна. Ми личеше на НЛО, но неможам да потврдам бидејќи никогаш нешто слично не сум видел во животот. Се се случи пребрзо и не успејав да ја сликам за да имам доказ за она што го видов- вели Ненад Ѓ., кој ја гледал необичната појава од својот двор во близина на Соколанскиот парк.

И луѓе кои во тој период шетале во центарот на градот ја виделе големата  светлосна топка како паѓа од небото. Никој не може со сигурност да потврди за што станува збор, но на шега велат дека Куманово го надлетуваат НЛО.  

Во кумановската полиција велат дека никој од граѓаните кај нив не пријавил за таква појава, поради што незнаат што виделе кумановци во наведениот период.